Út að ganga, ræktin, næra sig rétt og sofa vel, en samt eru þyngslin undirliggjandi!

Þetta ástand bæði hér heima á Íslandi og um veröld víða, vegna Covid og sóttvarnaaðgerða í heiminum, er virkilega farið að taka sinn toll. Það sem hrellir mig þó hvað mest eru sóttvarnaraðgerðir, sem að mér finnast ekki vera að skila neinu nema ótta og kvíða, sem og samfélagslegu hruni, bæði félagslegu og fjárhagslegu. 

Það ber ekki öllum saman um hversu hættuleg þessi veira er, það virðist sem hún sé að breytast í frekar sakleysislega pesti, hjá stærstum hópi þeirra sem eiga að bera veiruna í sér, samkvæmt mælingum. Það er sem sagt bannað í dag að fá pest, því þá verður maður að fara í einangrun frá öðru fólki. 

Því er verið að eyða tíma og fjármunum í öll þessi test og það eru sko engar smá upphæðir, frekar en að nota þá í að leysa vanda heilbrigðiskerfisins og Landsspítalans. Veirunni verður ekki útrýmt, það hefur vissulega sýnt sig. 

Ég sem ríkisborgari þessa lands finnst verið að skerða mín réttindi meir og meir, með hverjum deginum sem að líður, en rökin fyrir því eru míglek í meira lagi. Hömlur virðast vera settar hamlanna vegna, en ekki fyrir mig, ekki fyrir okkur almenning, ofurstjórnun sem t.d. er í gangi í Ástralíu, hugnast jafnvel mörgum hér á landi, sem að eru ekki mínir skoðanabræður. 

Að búa til fallegu og ljótu börnin hennar Evu, bólusettir og óbólusettir. Fólki finnst það bara í lagi að neyða fólk í bólusetningar með tilraunalyfjum, þar sem að lyfjafyrirtækin eru án allrar ábyrgðar. Sjálf er ég bólusett með slíkum lyfjum, tók þá ákvörðun, þar sem að loforð voru gefin um að þá færi lífið aftur í eðlilegar skorður, þegar að búið væri að bólusetja u.þ.b. 70% þjóðarinnar. En svo er nú ekki og þeir fullorðnu einstaklingar sem að eru óbólusettir eru gerðir ábyrgir, ekki þetta tilraunabóluefni sem er ekki að virka eins og vonir stóðu til, en samt á að neyða fólk í að láta dæla meiru af því í sig, þar sem að bólusetningarpassinn minn eftir tvær sprautur er nú orðinn úrheldur.  

Er það virkilega svo að menn láti bara leiða sig áfram án allrar gagnrýni, án þess að spyrja spurninga og án þess að sýnilegur árangur sé af þessum sprautum, eins og lagt var upp með. 

Athugasemdir

[Sigurður Kristján Hjaltested, 14.1.2022 kl. 20:33]

Því miður virðist það rauninn G.Helga.

Takk fyrir að standa með mannréttindum og

lýðræði í þínum pistlum.

Aldrei fyrr hefur verið eins sótt að mannréttindum og

er gert í nafni Covid.

Hvenær ætlar fólk að vakna...??

Þegar þú getur ekki verslað nema með passa.?

Þá er orðið of seint að bregðast við.

[G Helga Ingadottir, 15.1.2022 kl. 01:02]

Sammála því Sigurður, það er of seint að byrgja brunninn þegar að barnið er dottið í hann og það er það sem að ég kvíði mest, að menn vakni ekki fyrr en of seint.

Ég velti því fyrir mér hvort að gyðingar fyrir seinni heimstyrjöldina hafi haft hugmyndaflug í hvernig ofsóknirnar, sem voru byrjaðar fyrir stríðið, ættu eftir að leiða þá til dauða úr hungri, pyndingum og í gasklefum SS manna. Að menn gætu verið svona grimmir. En jú, og ennþá er verið að myrða fólk, svelta og pína, en við erum svo upptekin af þessari veiru sem virðist vera orðin frekar veikburða, ef að marka má hversu útbreidd hún er, en fá dauðsföll, (þetta á jú að vera drepsótt) að við heyrum hvorki né sjáum.  Þjáningarnar allt í kring um okkur, sem sýnir að mennirnir hafa lítið eða ekkert breyst og stjórnast af eigin hagsmunum og græðgi.

Ég sjálf er er ekki saklaus, hugsa jú fyrst og fremst um eigin hag, en er þó meðvitum um þann veikleika minn, kannast við græðgina. Það sem ég meina er að engin er alveg saklaus, en græðgin verður ekki hamin, ef við getum ekki séð hana í okkur sjálfum. Engin maður er án græðgi, sumir myndu kannski kalla það sjálfsbjargarviðleitni, huggulegri lýsing, en hver er sjálfum sér næstur. 

Hins vegar - ef að við viljum lifa í samfélagi þar sem að rödd okkar allra heyrist, já og ekki bara heyrist, heldur sé hlustað, þá verðum við að hafa kjark til að standa með sannfæringu okkar. Við þurfum að tala, rökræða og hlusta á fleiri en eitt sjónarmið, já og hafa persónulega skoðun, ekki bara láta matast.

Og til að lýðræðið virki þá þurfa allar raddir að heyrast, ekki bara ein Ríkisrödd. RUV hefur gengið fram með þeim hætti að það er móðgun við lýðræðið, sérvaldir gæðingar sem fá að tjá sig trekk í trekk, en látið í það skína að allar aðrar skoðanir séu byggðar á falsfréttum, í það minnsta grunnhyggnar og séu skoðanir minna menntaðra þegna, sem að ekkert vit hafi á málinu. Þeim þurfi því að stýra og mata af betri og mun upplýstari skoðunum þeirra sem að vitið hafa. Sem sagt FORRÆÐISHYGGJA, ekki lýðræði, engin heilbrigð skoðanaskipti. 

Ég á erfitt með að treysta þeim sem með valdið fara, þegar að þeir fara að verða ósamkvæmir sjálfum sér, segja eitt í dag og annað á morgun. Jú vissulega má fólk alveg skipta um skoðun, en þegar að þín skoðun hefur það vald að hún hefur svo mikil áhrif á líf fólks, heilsu og framfærslu, þá þarf að stíga varlega til jarðar og huga að sem flestum þáttum, hlusta á fleira en eitt sjónarmið. 

Mér finnst einkennilegt að fólk tjái sig með þeim hætti að stjórnmálamenn sem að eru lýðræðislega kosnir til að stjórna þjóðarskútunni, eigi að fara í einu og öllu eftir minnismiðum Þórólfs, en ekki vega og meta fleiri sjónarmið. Ég kaus ekki Þórólf, hann er ekki á þingi. Ríkisstjórnin og Ráðherrar hennar eiga hins vegar að taka fulla ábyrgð á því sem gert er, ekki getað bent á einhverja sérfræðinga sem hafi leiðbeint þeim og hjálpað í ákvarðanatökum, þau eiga að bera fulla ábyrgð, til þess eru þau kosin. 

[Magnús Sigurðsson, 15.1.2022 kl. 06:34]

Takk fyrir góðan pistil Helga, og ykkur Sigurði fyrir ekki síðri athugasemdir.